Giro d’Italia, Vuelta Espana abo njedawno zakónčena Tour de France – Europa ma tójšto wulkich kolesowarskich kołojězbow. Něhdy rěkaštej kolesowarskej hwězdźe Jan Ullrich a Lance Armstrong, dźensa Jonas Vingegaard a Tadej Pogačar. Fascinacija kolesowarskeho sporta na wubědźowanskich kolesach žana nowostka njeje. Tola w zašłych lětach nasta njejapcy tójšto wólnočasnych kolesowarskich skupin. Tak tež we łužiskich wsach.
Jan Rjeda je čłon tajkeje skupiny. Wón měni: „Naša kolesowarska skupina w Kukowje je w nalěću 2021 nastała, to smy byli štyrjo abo pjećo, kiž su so w koronačasu prawidłownje po njedźelach zetkawali. Nichtó njeměješe wulce ničo druhe planowane. Tak smy nimale tydźensce w krutej wobsadce jězdźili. Mjeztym je skupina na 27 čłonow rozrostła. Zwisuje to hłownje z tym, zo su so Worklečenjo z nami zjednoćili. Druhdy smy po puću jako dwójka, druhdy tež dźesaćo.“