Zornowc Hórki chětro twjerdy worjech był

štwórtk, 09. januara 2020
artikl hódnoćić
(0 )
Michała Młynka (srjedźa, Hórki) zadźeržeć njebě minjenu sobotu w Chrósćicach docyła tak lochko. Hrajer prěnjeho koparskeho mustwa Rakečanskeho ST bě z dźewjeć wrotami najlěpši třělc turněra wo pokal TCM.  Foto: Jörg Stephan Michała Młynka (srjedźa, Hórki) zadźeržeć njebě minjenu sobotu w Chrósćicach docyła tak lochko. Hrajer prěnjeho koparskeho mustwa Rakečanskeho ST bě z dźewjeć wrotami najlěpši třělc turněra wo pokal TCM. Foto: Jörg Stephan

Kóždolětny tradicionalny koparski turněr­ wo pokal Towarstwa Cyrila a Metoda (TCM) wotmě so minjenu sobotu­ w Chróšćanskej sportowej hali. Dypkownje w 15 hodź. bě tam na witanju šěsć mustwow.

Turněrowe wjednistwo wokoło Guida Zahrodnika dojedna so na to, zo hraje najprjedy raz kóždy přećiwo kóždemu. Po krótkim rozjasnjenju regulow prěnju hru zahwizdachu. W tej steještej sej hnydom dwě sylnej mustwje napřemo sebi: zakitowar titula Puklot a na tamnej stronje mustwo Čornobóh. Wobaj cyłkaj wobsteještej z koparjow Sportoweje jednotki 1981 Chrósćicy. Wurunana partija skónči so 3:1 za Čornobóh.

W dalšim přeběhu turněra wukristalizowachu so poněčim dalši faworića na dobyće. Zornowc Hórki a młode mustwo Kapałka United z Dobrošic běštej mjez druhim dalšej kandidataj na finale. Wšitke štyri mjenowane cyłki su so na kóncu tež za połfinale kwalifikowali.

W prěnim nastupi Čornobóh Chrósćicy přećiwo Kapałce United Dobrošicy. Mustwo Čornobóh, kotrež bě dotal kóždu hru dobyło, tež tutón nadawk suwe­renje zmištrowa a přećiwnika z 5:0 po­razy.

Tamne połfinale bě wosebje napjate. Puklot Chrósćicy a Zornowc Hórki wo­jowaštej wo kóždy bul. Skónčnje so Hórčenjo wokoło kapitana Michała Młynka z 3:2 snadnje přesadźichu. Slědowaše dwubój wo bronzu. Po njeporadźenym zakitowanju titula chcyše sej Puklot znajmjeńša hišće třeće městno zawěsćić, štož so jemu na zbožo poradźi.

Skónčnje bě tak daloko a sudnik zahwizda finale. W předkole bě Čornobóh Zornowc hišće z 2:1 přewinył, w finalu pak běchu Hórčenjo lěpši a agresiwniši. Rjane kombinacije pak přihladowarjam w finalu žane njeposkićachu. Hórčenjo stejachu hłuboko, swoje wrota z cyłej mocu zakitowachu a po móžnosći kontery sadźachu. Z tej taktiku běchu wuspěšni a dobychu kónčnu hru 4:1.

Čornobóh móžeše so po přěhratym fina­lu tróštować, dokelž wuzwolichu z jeho­ mustwa Jonasa Zyndu jako najlěp­šeho hrajerja a Fabiana Hejdušku jako najwustojnišeho wrotarja turněra. Z dźewjeć wrotami bě Hórčan Michał Młynk najwuspěšniši třělc. Najfairniše a zdobom najmłódše mustwo bě Módra pjeć.

Jurij Špitank turněr wo pokal Towarstwa Cyrila a Metoda ze zbožopřećemi do lěta 2020 zakónči.

Kónčne zaměstnjenje: 1. Zornowc Hórki, 2. Čornobóh Chrósćicy, 3. Puklot Chrósćicy, 4. Kapałka United Dobrošicy, 5. Chróšćan banda, 6. Módra pjeć

Feliks Cyž

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND