Kopenhagen (kh/SN). Danska je so tola hišće za koło najlěpšich šěsnaćoch na europskich mišterstwach (EM) kwalifikowała, a to po dramje w prěnjej koparskej hrě wokoło Christiana Eriksena a po poražkomaj 0:1 přećiwo Finskej a 1:2 přećiwo Belgiskej. Přećiwo Ruskej su Danojo z njewšědnej energiju wčera wojowali a 4:1 dobyli. Rjekojo dnja běchu Kasper Damsgaard (38.), Yussuf Poulsen (59.), Andeas Christensen (80.) a Joakim Maehle (82.). Za Rusku móžeše jeničce Artjom Dźjuba (70.) z dwělomnym pokutnym kopom na 1:2 skrótšić.
W paralelnej hrě mjez Finskej a Belgiskej wupadaše dołho za tym, zo poradźi so Finskej snano hišće sensacija, tola krótko do kónčneje fazy hry trjechi dotal najlěpši Fin samowrota. Po róžku z lěweje strony zhłójčkowa Belgiski škitar Thomas Vermaelen bul na aluminij. Wottam skoči hrajny nastroj wrotarjej Lukášej Hrádeckemu njezbožownje na ruku a do wrotow (74.). Krótko po tym Romelu Lukaku na 2:0 (81.) zwyši, a hra bě rozsudźena.