W Ketlicach pola Lubija zemrě 19. róžownika 1904 prěni wulki hudźbny mišter Serbow, wučer, kantor a dirigent Korla Awgust Kocor. Wón bu na tamnišim kěrchowje při jeho južnej muri pódla swojich přiwuznych pochowany a měješe najprjedy jenož němskorěčnu narownu taflu. Kónc dwacetych lět 20. lětstotka bu serbska tafla připrawjena a narowny pomnik wjacekróć wu­dospołnjeny, mjez druhim najdostojnišo k III. festiwalej serbskeje kultury 1972. Na tafli narowneho pomnika čitamy kaž hižo nimale sto lět „Korla Awgust Kocor 1822–1904 Serbow hudźbnik“ a wuhladamy jeho portret.