Kaž je hižo wjele lět z tradiciji, pobychu šulerjo 7. lětnika Slepjanskeje Wyšeje šule „Dr. Marja Grólmusec“ prěni tydźeń po zymskich prózdninach w sněhakowarskim lěhwje Neudorf blisko Oberwiesenthala. Najebać miłe temperatury tam sněh přeco hišće ležeše.
Hnydom k zazběhej sněhakowarskeho lěhwa mějachu Slepjanscy šulerjo napinacy dźeń. Połdrahodźinskeho zapozdźenja Šmrěčnikoweje wuskokolijoweje železnicy dla njemóžachu sej wot młodownje hač k sněhakowarskej šuli dojěć. Tak dyrbjachu so pěši na něhdźe pjećkilometrowsku a nimale stajnje stupacu čaru podać, zo bychu sej hodźace črije a sněhaki wupytali.