Dwaj dnjej po lětušim 32. běhu po Krakečanskich hórkach slědowaše 31. róžownika dalše wurisanje za rjadnu lisćinu, Wopačanski cup běharjow. Při přijomnym wjedrje wotmě so 8. Ramnowski Fichtowy běh w idyliskej krajinje. Wubědźowało je so tam nimale 200 atletow. Jednotliwe distancy běchu 0,8, 2,2 a 7,5 km. Aktiwni běchu hłownje z Hornjeje a srjedźneje Łužicy, Drježdźan, Radeburga a Wehlena a mjez nimi tež zaso horstka serbskich lubowarjow běhanja a walkinga.
Na distancy 0,8 km za młódšich šulerjow rěkaštaj dobyćerjej z Biskopic Richard Marschner (2:33 min) a Theresa Hesse (2:31 min), wobaj skupina U 10. Franc Žur z Budyšina wobsadźi w U 8 dobre 8. městno (3:55 min).
Na 2,2 km za staršich šulerjow a młódšich młodostnych (62 w cilu) běštaj dobyćerjej Sebastian Böhme z Drježdźan (U 16/6:25 min) a Laura Robel z Döberna (U 16/6:50 min).