Nowopřichad Energije steji we wrotach

srjeda, 29. septembera 2021
artikl hódnoćić
(0 )
Nowy wrotar FC Energije Choćebuz Till Brinkmann  Foto: Georg Zielonkowski Nowy wrotar FC Energije Choćebuz Till Brinkmann Foto: Georg Zielonkowski

Před krótkim je FC Energija Choćebuz z Tillom Brinkmannom dalšeho wro­tarja angažowała. 25lětny muž mjez žerdźomaj dósta po dwutydźenskej testo­wej fazy zrěčenje.

Nimo stajneho wrotarja Tonija Stahla ma drje FCE z Eliasom Bethke a Corbinianom Moye młodeju wrotarjow jako rezerwu, wobaj pak staj w młodźinje A w zwjaz­kowej lize trěbnaj. Sportowy nawoda Maxi­milian Zimmer rjekny: „Smy intensiwnje z trenarskim teamom a nazwučowarjom za wrotarjow Antonom Wittmannom rěčeli a so rozsudźili, zo dóstanje naš trijo hišće dalšeho wrotarja. Till je so w probowym treningu předstajił a jara dobry zaćišć zawostajił, sportowsce a čłowjesce. Wjeselimy so, zo je wón nětko dźěl mustwa.“

Z wulkosću 1,99 metrow je Brinkmann nětko najwjetši hrajer w teamje FCE. 25lětny hraješe jako junior pola SC Paderborn a pola Arminije Bielefeld, pozdźišo bě wón za druhe mustwo SC Paderborn aktiwny. Za prěnje mustwo wuchodnych Westfalow měješe wón w sezonje 2016/2017 w třećej lize raz zasadźenje přez 90 mjeńšinow.

wozjewjene w: Sport
Prošu přizjewće so, chceće-li komentar podać

nawěšk