Je zrowastanjenje Jězusa historiski fakt? Wikipedija statistisce wotmołwja: Dwě třećinje bohosłowcow, kotřiž su so z tym zaběrali, prajitej: Haj. ChatGPT salomonisce zdźěli, zo je dźiw zwonka toho, štož móhł stawiznar dopokazać. Faktologija płaći drje dźensniši dźeń porno „fake newsam“ jako wupuć do rozuma, ale hižo ček faktow zjawnoprawniskeho rozhłosa ludźi druhdy polarizuje. A kelko wulkich demonstracijow a masowych peticijow su ludźo zašłe lěta přećiwo wotkrytym zapřisahańcam a pozdatnym skandalam organizowali, kotrež so po dalšich rešeršach abo sudniskich jednanjach skerje same jako fake wupokazachu.

Zahority pokiw, zo powěsć w kanalach social-media-syćow „wiralnje dźe“, potajkim so jara chětř rozpřestrěwa, njewoznamjenja, zo je wona wěrna. Nostalgiski nawrót do pozdatnje dobreho stareho časa, hdyž je prěnjotnje lektura nowin ludźi wo swěće informowała, pak njefunguje. Zo je Weimarska republika zahinyła, njezaležeše na pobrachowacym zajimje za nowiny – nawopak, wone su ze swojim mjezsobnym škaranjom puć do katastrofy sobu rubali.