Washington (B/SN). Po nowej namołwje zarjada USA za katastrofowy škit FEMA dóstanu přez njewjedra wobškodźene cyrkwje nětko pjenježnu pomoc za reparatury abo nowonatwar. Principa dźělenja mjez statom a cyrkwju dla njebě to do toho móžno. Nowinka wolóža mnohe cyrkwje předewšěm w Texasu, kotrež běchu loni přez hurrikan „Harvey“ wulke škody poćerpjeli. Organizacija Zjednoćeni Američenjo za dźělenje cyrkwje wot stata drje protestuje, prezident USA Donald Trump pak pomoc zakituje.

Křesćansku kulturu sylnić

Frankfurt n. M. (B/SN). Kulturna integracija mnohich ćěkancow je po słowach zamołwiteho ewangelskeje cyrkwje Johanna Hinricha Claussena jedyn z najwažnišich nadawkow w lěće 2018. Za cyrkej ma při tym nabožinska kultura centralny wuznam. „Nabožina smě w Němskej zjawnje widźomna być, dokelž je dźěl towaršnosće. Wona pak ma tež nadawk, so jako socialnje znjesliwa a wužitna wopokazać“, měni Hamburgski teologa. Wužadanje cyrkwje a towaršnosće je, nabožinsku kulturu tak daloko wotewrěć, zo móža so nowe „nabožne zhromadźenstwa z prawami a winowatosćemi na njej wobdźělić“.