Drježdźany (SN/MkWj). Rada za serbske naležnosće Sakskeje je so na swojim wčerawšim wuradźowanju w Drježdźanach z etatom swobodneho stata za lěće 2019 a 2020 zaběrała. W nim njejsu jeno srědki za financowanje Załožby za serbski lud zakótwjene, ale tež dalše wudawki na dobro Serbow, kaž předsydka rady Marja Michałkowa na naprašowanje SN informuje. Tak zaplanuja cyłkownje 300 000 eurow, kotrež chcedźa komunam wupłaćić, zo bychu jim přidatne wudawki w zwisku z dwurěčnosću zarunali. Ministerski prezident Michael Kretschmer (CDU) bě to nalěto připowědźił. Wo wužiwanju pjenjez komuny same rozsudźeja. Dalše 300 000 eurow chcyło knježerstwo za imageowu kampanju na dobro dwurěčnosće a za šěrjenje wědy wo Serbach wudać. Serbska rada to wuraznje wita, kaž Michałkowa pisa.
Na posedźenju přihotowali su zetkanje serbskeju radow Sakskeje a Braniborskeje spočatk decembra w Drježdźanach. Rozjimać chcedźa tam kubłanske prašenja a nazhonjenja z wubědźowanja „Rěčam přichilena komuna – Serbska rěč je žiwa“. Wo wubědźowanju su mjeztym brošurku zhotowili, kotruž ministerstwam a komunam přepodadźa.