Pod motom „Budyšin so hiba – nětko ćim bóle!“ je Budyski MSV 04 wubědźowanski běh, tak mjenowanu „šulsku challenge 2020“ organizował. Wón měješe narunać planowany Budyski měšćanski běh w septembrje, kotryž běchu koronawirusa dla wotprajili. Tež dwanatkarjo Serbskeho gymnazija Budyšin su so nětko z wulkim wuspěchom na běhu wobdźělili.
Minjeny štwórtk podźakowa so hłowny organizator Budyskeho měšćanskeho běha Steffen Waldmann wuspěšnym šulerkam a šulerjam 12. lětnika SGB za jich angažement na wubědźowanskim běhu šulow a přepoda jim w sportowej hali Serbskeho šulskeho a zetkawanskeho centruma Budyšin wopisma a pjenježne myta. Na mjenowanym wubědźowanju mějachu młodostni nadawk, w dwanaće mjeńšinach tak wjele metrow kaž móžno naběhać. A rezonanca bě njesměrnje wulka. Wšako wobdźěli so cyłkownje 1 294 šulerjow a šulerkow z 73 rjadownjow dwanaće startowacych šulow. Dohromady naběžachu woni cyłkownu čaru nimale 2 480 kilometrow.