Maćij Šěn
Fota: Mato Eckert
Wolejbul je w našim kraju druha najwoblubowaniša wólnočasna sportowa družina. Skoro kóždy z nas drje je hižo raz sobu hrał, hač na łuce, w pěsku abo w hali. Poprawom je hraće lochke. Bul z ruki přez sak, přećiwne mustwo hraje dwójce tam a sem a potom zaso wróćo přez sak, doniž bul na zemju njepadnje. Zo je wolejbul tola kusk komplikowaniši a wotběhi jara kompleksne, to kóždy wě, kiž sej dypkowe hry we wyšich klasach wobhladuje. Lubowarjo rjaneho sporta při wysokim saku tež wědźa, zo ma kóždy hrajer swojej poziciji wotpowědnje cyle wosebite nadawki. Čitarjam předstajamy pod štyrjomi dypkami muži prěnjeho wolejbuloweho mustwa Viktorije Worklecy a jich pozicije.
1. Wonkowni nadběhowarjo a wonkowne přiwzaće
Nadběhowar chce kóždy rady być. Bul do pola přećiwnika prasnyć, dypkować a so z lubuškom publikuma stać. Druha, runje tak wažna strona tuteje pozicije pak je přiwzaće, z kotrejž so kóždy nadběh započina. Přiwzaće wšak njebě w zašłych lětach runjewon šokolodźana stronka Worklečanow.