Kapitan Hagemann hraje dale w čorno-běłych barbach krajneho koparskeho ligista Budissy
Kopar Tom Hagemann, kiž tabulku třělcow wrotow w přetorhnjenej hrajnej dobje w krajnej lize z wosom wrotami nawjeduje, je njedawno swoje zrěčenje z krajnym koparskim ligistom Budissu Budyšin wo jedne lěto podlěšił. Pokazał je tak sylne znamjo za swoju zwjazanosć ze sportowym towarstwom sprjewineho města. Mustwo a zamołwići Budissy derje wědźa, što na nim maja, dokelž słuša k najwažnišim rutinjejam koparskeho kluba. 26lětny njeje jeno za swoje kwality nastupajo wotzamknjenja před přećiwniskimi wrotami znaty. Wón swój team tež mentalnje jara skruća.
Hač do lěta 2016 móžeše wuběrny srjedźny nadběhowar swoje kmanosće na přikład pola U 19 a druheho zastupnistwa Dynama Drježdźany wuwiwać, prjedy hač dźěše k Biskopičanskemu koparskemu towarstwu, hdźež je dohromady tři lěta za bulom honił.
