Zwažu sej rjec, zo koncept zwjazkoweje wobory, młodych muži a tež žony za słužbu do wobory wabić, fungować njebudźe. Wšako jedna so wo dobrowólny rozsud narěčanych. Tuchwilu dóstawaja młodźi mužojo a žony, kotřiž su w lěće 2008 rodźeni, list, kotryž wo šansach informuje, kotrež we woborje maja. Přicpěwam tutomu projektej tři lěta, doniž njezwrěšći. Što, hdyž so dobrowólni njenamakaja? Změni so projekt z dobrowólnosće potom na winowatosć? Prašam so: Čehodla so telko młodych muži słužbje we woborje wuhiba? Hdyž sej dnjowy program wobory wobhladaš, je to jeničke negatiwne na wšěm, zo maja wojacy zahe a druhdy tež nahle stawać abo zo maja pruwowanje w ekstremnych wuměnjenjach złožić. Ale: Za tute „nječłowjeske“ wužadanja dóstawaja porjadny zóld, dźensa prajimy mzdu a to samo wjetšu, hač sej ju wučer w prěnim lěće dźěła domoj nosy. Snano dobrowólnikam tak derje płaća, dokelž dyrbja w padźe wójny Němsku a z tym nas wšitkich zakitować.