Praha (ČŽ/K). Čěski prezident Miloš Zeman bě wot wutory wječora hač do kónca tydźenja na statnym wopyće w Armenskej. W Jerewanje je wón z jeje statnej hłowu Seržom Sargsjanom jednał wo dalšim pohłubšenju zhromadneho dźěła mjez krajomaj. Wo to dźěše tohorunja na čěsko-armenskim předewza­ćelskim forumje, na kotrymž so hósć z přednoškom wobdźěli. Wusahowacy dypk jeho wizity bě wopyt wopomnišća za połdra miliona zamordowanych Armenjanow přez Turkow za čas Prěnjeje swětoweje wójny. K jich počesćenju połoži Miloš Zeman wěnc a sadźi w lěsku módrych šmrěkow tajki štomik, kotremuž přitykny cedlku z wurazom ludomordarstwo. Zdobom wón přilubi za to so zasadźić, zo tež čěski sejm njeskutk oficialnje woznamjeni jako ludomordarstwo, kaž je to nětko Němska njedźiwajcy hroženjow Turkowskeje činiła a do toho hižo Francoska, Italska a mnohe dalše staty. Na wopyće swětoznateje palencarnje Ararat zwěnowachu wysokemu hosćej z Čěskeje blešu konjaka z lěta 1944, lěta jeho narodnin.