Brexit so na Polakow we Wulkej Britaniskej chětro raznje wuskutkuje
Waršawa. Rozsud wobydlerjow Wulkeje Britaniskeje, Europsku uniju wopušić, je tež Polakow šokował. Hišće na dnju wothłosowanja bě so šefredaktor Gazety Wyborczeje Adam Michnik z naležnym apelom na titulnej stronje na nich wobroćił w nadźiji, zo „rozum dobudźe“. Bjezposrědnje po brexiće wšak so Polakow reprezentatiwnje prašachu, što wo Europskej uniji dźerža. Při tym so wukopa, zo su wulcy fanojo zhromadźenstwa statow: Na wšě 81 procentow woprašanych chce dale w EU wostać.
Předsyda knježaceje strony Prawo a sprawnosć (PiS) Jarosław Kaczyński je spěšnje zwěsćił, štó je wina na rozsudźe: wša Europska unija, kotraž so do naležnosćow druhich krajow tyka a wězo něhdyši pólski ministerski prezident Donald Tusk, dźensa šef Rady EU. Wšitcy wodźacy zamołwići EU dyrbjeli hnydom wotstupić, sej Kaczyński žadaše.
