Češa jeno čěske nawoči noša

wutora, 14. měrca 2017
artikl hódnoćić
(0 )

NAWOČI su w susodnym kraju zawěrno požadany artikl. Dobre štyri miliardy krónow měješe wóčna optika loni wobrota. Wot něhdźe lěta 2010 sem su optikarjo kóžde lěto štyri hač do šěsć procentow wjace nawočow předali. Na přehladce Opta w Brnje zdźěli tole nowinarjam čłon předsydstwa Zjednoćenstwa čěskich optikarjow a optometristow Ivan Vymyslický. Po jeho sudźenju ke konjunkturje na brylowych wikach předewšěm přinošuje wobstejnosć, zo ličba staršich ludźi njepřestajnje rosće. Ći sej z přiběracymi financnymi móžnosćemi časćišo nowe nawoči popřewaja a hladaja k tomu tež hišće na lěpšu kwalitu. Dalši pozitiwny faktor móhł być, zo nałožuja firmy wjace pjenjez za kwalifikaciju sobudźěłaćerjow a wšelakore jich kubłanja kaž tež za marketing. Wukrajne discountery kaž němski Fielmann njejsu so na čěskich wikach přesadźić móhli. Te wobknježa syće čěskich mějićelow. Najwjetšej syći matej firmje Fokus Optik a Eiffel Optik, kóžda z 90 předawarnjemi po cyłym kraju.

wozjewjene w: Słowjanski wukraj
Prošu přizjewće so, chceće-li komentar podać

Serbska debata

nowostki LND