Dźeń a wjace ludźi susodneho kraja so na jutrowne tradicije dopomina

Praha (HJS/SN). Lětsa je tomu druhi króć, zo je ćichi pjatk w Čěskej republice zakonski swjaty dźeń, na kotrymž so njedźěła. Za čas komunistiskeho, cyrkwi njepřećelsce zmysleneho knjejstwa, běchu tónle dźeń 1951 jako swjatk wotstronili. Zo su zakaz loni zběhnyli, je předewšěm zasłužba křesćanskodemokratiskeje strony KDU-ČSL, kotraž je jako juniorpartner sobu w knježerstwje.

Dotal w kraju stajnje zaso argumentowachu, zo kóždy swobodny dźeń hospodarstwu škodźi. Nimo toho njeje 60 procentow wobydlerstwa kraja na někajke wěrywuznaće wjazanych. A woprawdźe: Loni je jenož mało Čechow swobodny ćichi pjatk wužiwało, zo bychu do cyrkwje šli. Mnohim bě tón dźeń dobra składnosć za wulkonakup. Lědma štó dwěluje, zo budźe tomu lětsa hinak.