POLICIJA w Čěskej smě so zawěrno wjeselić – dobreho mjena mjez ludźimi dla. Wuchadźa dźě z wotpowědneho woprašowanja zwěsćowarnje měnjenjow STEM, zo 65 procentow wobydlerjow policiji dowěrja. Tak wulki njebě podźěl w minjenych 25 lětach hišće nihdy. Lěta 2002, jako je so STEM w tejle naležnosći prěni raz wobhonjała, wučinješe kwota 46 procentow. Najniša bě wona 1997 z jeničce 27 procentami „Daty ze zažnych 90tych lět přeradźeja, zo njeje za policiju po změnje režima 1989 lochko było ludźi wo swojej dowěryhódnosći přeswědčić“, prawiznicy agentury hódnoća. Po jich analyzy je minjeny čas dowěra do policije wosebje mjez ludźimi, staršimi hač 60 lět, a wobydlerjemi z nišim kubłanjom chětro přibyła. Wot poslednjeho zwěsćowanja je nahladnosć policije cyłkownje wo štyri procenty zrostła. „Smě so za to měć, zo tuchwilny staw policije zjawnosć tež tohodla pozitiwnje hódnoći, dokelž njeje mjez njej wuraznych aferow. A najskerje wotbłyšćuje so w tym žedźba za zwyšenej prezencu wěstotnych słužbow dźiwajo na migracisku krizu“ prawiznicy STEM komentuja. Na justicu so porno tomu křiwje hlada.