Kijew (ČŽ/K/SN). Předsydka strony Wótčina Julija Timošenko ma wotpohlad, lěta­ 2019 kandidować za prezidentku na Ukrainje. W rozmołwje z telewizijnym kanalom News One wona rjekny, zo chce so jako naslědnica Petra Porošenka wosobinsce wo to postarać, zo „Ukraina zaso na nohi přińdźe“. Julija Timošenko, kiž je 2005 a 2007 dwójce zastojnstwo premierki zastawała, bě so tež hižo dwaj razaj wo wuzwolenje na hłowu stata prócowała. Lěta 2010 podleža wona proruskemu kandidatej Wiktorej Janukowičej, lěta 2014 potom Petrej Porošenkej, zaběrajo z přibližnje 13 procentami jenož druhe městno. Za čas Janukowičoweho knježenja běchu Timošenko k wjace­lětnej jatbje zasudźili, wumjetujo jej pjenježne­ jebanstwo, pozdźišo pak ju dospołnje­ zrehabilitowachu. Při namócnych podawkach na „majdanje“ w Kijewje k powalenju Janukowiča bě Timo­- šenko jedna z hłownych nawodnicow protestowacych. Ukrainskej telewiziji wona wuzna, zo je zludana z jednanjow ukrainskich politikarjow, kotrychž je něhdy podpěrała, tak Wiktora Jušćenka a ekspremiera Arsenija Jacenjuka.