Praha (ČŽ/K/SN). 30. róčnicu somoćaneje rewolucije w Čěskosłowakskej wosławitaj šefaj knježerstwow Čěskeje a Słowakskeje njedźelu, 17. nowembra, zhromadnje z kolegomaj Visegrádskeje štyrki­ (V4), potajkim z Pólskeje a Madźarskeje. Dopołdnja wotměja so wšelke zarjadowanja w Praze, popołdnju w Bratislavje. W čěskej stolicy wotewru ministerscy prezidenća w Narodnym muzeju wustajeńcu, dokumentowacu na najwšelakoriše wašnje spomnjeny wurjadny stawizniski po­dawk. Po wobjedźe w Kramářovej wili podadźa so woni do Słowakskeje. Při pomniku Brana (wrota) svobody pod hrodom Devín na kromje słowakskeje metropole a njedaloko awstriskeje hranicy wobdźěla so premierojo na ceremoniji za wopory swój čas kruće stražowaneje mjezy. Po swjedźenskej wječeri dožiwja nawodni zastupnicy krajow V4 w Słowakskim narodnym dźiwadle galaprogram načolnych słowakskich a čěskich wuměłcow. Na njón su wšitcy najwyši wustawowi reprezentanća minjenych 30 lět přeprošeni, njehladajo na stronsku přisłušnosć abo politiske skutkowanje.