Dale přiběrace koronainfekcije w Pólskej – medicinska rada rozpušćena
Waršawa. Rada lěkarskich fachowcow, kotraž pólske knježerstwo w boju přećiwo koronawirusej poradźuje, je faktisce rozpušćena. Z cyłkownje 17 čłonow je 13 gremij wopušćiło. Hłownu přičinu rezignacije je jedyn z nich w jeničkej sadźe zjał: „Nichtó na nas njesłucha“.
Jedyn z najpopularnišich zastupnikow rady, Wrócławski lěkar, prof. Krzysztof Simon, w rozmołwje z nowinarjemi zwěsći, zo nima dźěło komisije hižo žanoho zmysła. Wón ma zaćišć, zo knježerstwo poručenja medicinskeje rady drje na wědomje bjerje, ale so po nich nima, wosebje šćěpjenje pře koronu nastupajo. Skerje nawopak! W sejmje je sylny blok zapósłancow, kotřiž cyle zjawnje přećiwo šćěpjenju wustupuja, bjez toho zo by so knježerstwo jim spjećowało. Tak móžeše šulska radźićelka Barbara Nowak, wažna politikarka na polu kubłanja, zjawnje rjec, zo ma šćěpjenje „za wulki eksperiment na ludźoch“. Prof. Simon je sej wěsty, zo by sylny signal był, bychu-li so čłonojo knježerstwa a wšitcy zapósłancy sejma a senata přećiwo wirusej šćěpić dali.