Marek Krawc rozprawja wo aktualnje rozjimanych temach w Čěskej
Praha. Pjatk a sobotu tydźenja mějachu Češa składnosć, nowych zastupjerjow do wobwodnych parlamentow wolić. Opoziciska strona miliardara a bywšeho premierministra Andreja Babiša doby w dźesać z třinaće regionow susodneho kraja. W tamnych třoch nažnjachu koaliciske strony tuchwilneho knježerstwa najwjace hłosow. Nimo toho čakaše třećina senatorow na šansu, z přizwolenjom wobydlerjow do hornjeje komory čěskeho parlamenta zaćahnyć móc. Po wólbach do senata měješe pjeć z nich absolutnu wjetšinu, tajke něšto je so prěni raz w stawiznach Čěskeje stało. Wo dóńće zbytnych senatorow w 22 wobwodach rozsudźa wolerjo w druhim kole. 33 procentow wólbokmanych wobdźěli so na wothłosowanju, pjeć procentow mjenje hač w lěće 2020. Hižo minjenu sobotu započachu we wšelakich městach nowych koaliciskich partnerow pytać. W južnej Morawje na přikład budu wšitke štyri knježerstwowe strony za čas přichodnych štyrjoch lět politiku postajeć.
