Marek Krawc rozprawja wo aktualnje rozjimanych temach w Čěskej

Praha. Wjacore tysacy lět wěnuje so čłowjek hižo pčołkam. W běhu lětstotkow je so dźěło z pilnymi překasancami po­stupnje změniło, tak trjeba dźensniše pčołarstwo modernu technologiju. Město papjery a pisaka wužiwa dźeń a wjace pčołarjow šmóratko a tablet za dokumentaciju swojeho dźěła. Dale dohladuja na přikład kamery a sensory pčolace ­ludy wotdaloka.

Vít Zaoral z Olomouca kliknje na kachličku (button/tastu) na swojim handyju a wuhlada hnydom wšitke daty swojich dźewjeć kołćow. Z nowej app „Beentry“ stajnje zwěsća, hdy je při swojich kołćach był a što je činił. App je zhromadnje ze swojimaj kolegomaj wuwiwał. „Wažne je, zo pčołar wě, kotre dźěła su trěbne. ­Znaju někotrych kolegow, kotřiž zapisuja sej stajnje hišće wšitke daty do zešiwkow. Po wěstym času pak hižo njewědźa, na čo so daty poćahuja. Naša app je pře­hladniwa. Do njeje móžeš hnydom při kołću wšitke trěbne informacije a samo fota zapodać. To lutuje čas“, powěda ­Zaoral.