Waršawa/Berlin (dpa/SN). Reagujo na němske pomjezne kontrole tež Pólska wot přichodneje póndźele swoje mjezy kontroluje. Tole je pólski ministerski ­prezident Donald Tusk na posedźenju knježerstwa zdźělił. Tež mjezu wuchodneho susoda Litawskeje chcedźa kon­trolować.

Zwjazkowy kancler Friedrich Merz (CDU) je němske pomjezne kontrole za wobmjezowanje ilegalneje migracije přećiwo přiběracej kritice wukraja zakitował. „Dyrbimy kontrolować, dokelž njeje škit europskich wonkownych mjezow w dosahacej měrje zaručeny“, wón rjekny.

Tusk nowinarjam we Waršawje znapřećiwi, zo reaguje z kontrolemi na zadźerženje němskeho knježerstwa. „Sym němsku stronu wospjet warnował a sym z nowym kanclerom Merzom wo tym rěčał“, wón praji. Dotalna sćerpna pozicija Pólskeje hladajo na jednostronske kontrole Němskeje pak dlěje móžna njeje.

Dźěłarnistwo policije z tym liči, zo suwaja na mjezy migrantow „tam a sem“: Němska je wotpokazuje a do Pólskeje wróćo sćele. Pólscy hranicarjo ludźi zaso do Němskeje sćelu.