Marek Krawc rozprawja wo aktualnje rozjimanych temach w Čěskej

Praha. Minjeny pjatk je w mnohich kónčinach susodneje Čěskeje milina wupadnyła. Čěska stolica, wobwodaj Liberec a Ústí nad Labem kaž tež srjedźne Čechi běchu potrjechene. Pobrachowaceje miliny dla dyrbjachu wobchody zawrěć. Ćahi, tramwajki a trolejbusy wostachu stejo a w Praze njejězdźeše metro. Tež tankownje, rafinerije a twornje kaž Škoda Auto hižo dźěłać njemóžachu.

Wjace hač 300 króć bě wohnjowa wobora po puću, zastojnicy dyrbjachu zwjetša ludźi z liftow wuswobodźić abo firmam nuzowe milinowe agregaty k dispoziciji stajić. Tajke nastroje na zbožo tež chorownje za čas wupada z trěbnej milinu zastarachu. Nawječor běchu škody zaso wuporjedźene.