Marek Krawc rozprawja wo aktualnje rozjimanych temach w Čěskej

Praha. Minjenu póndźelu zahajichu w Praze wustajeńcu „Člověk a jeho předchůdci“ (čłowjek a jeho prjedownicy). W Narodnym muzeju móža sej zajimowani fosilije předčłowjekow wobhladać, kotrež su wjace hač tři miliony lět stare. Jedna z wosebitosćow přehladki je kosćowc, kotryž mjenuja wědomostnicy Lucy. Je to jedyn z najstaršich zastupjerjow čłowječich wopicow, kotrehož zbytki bě ameriski paleoantropologa Donald Johanson z Clevelandskeho přirodowědneho muzeja ze swojim studentom Tomom Grayom 1974 w Etiopiskej nadešoł. Druha wosebitosć su kosćowe powostanki Australopitheca afarensis z mjenom Selam. Je to wobchowany fosil małeho dźěsća, kotryž je hišće wo sto tysac lět starši hač Lucy. Wobaj kosćowcaj stej najdrohotnišej eksponataj narodneho kulturneho herbstwa Etiopiskeje a požčonce tamnišeho Narodneho muzeja. Nimo toho jej prěni króć w Europje wustaja. „Poprawom stej tajke něšto kaž krónowe juwele Etiopiskeje.