Marek Krawc rozprawja wo aktualnje rozjimanych temach w Čěskej

Praha. W Čěskej republice wotměja so 3. a 4. oktobra wólby Doma zapósłancow. Na čěskich wulkopósłanstwach a konsulatach je so hač dotal něhdźe 27 500 wolerjow přizjewiło, kotřiž chcedźa swój hłós we wukraju wotedać. Prěni króć móža so Češa lětsa mjenujcy tež z listom na wólbach wobdźělić. Tola ličba registrowanych wólbokmanych je niša hač běchu zastojnicy wonkowneho ministerstwa wočakowali.

Po najaktualnišim powobličenju woprašowarnje Stem by 32,7 procentow Čechow stronje Ano (Haj) swój hłós dało. Wolerske zjednoćenstwo Spolu (Hromadźe) knježerstwowych stronow ODS, Top 09 a KDU-ČSL (Křesćanscy demokraća) by z 21,3 procentami druhe městno docpěło. Třeća najwoblubowaniša strona by prawicarska strona SPD (Swoboda a direktna demokratija) z jědnaće procentami była.