Marek Krawc rozprawja wo aktualnje rozjimanych temach w Čěskej
Praha. Wolerske zjednoćenstwo Spolu (Zhromadnje) knježerskich stronow ODS (Wobydlerscy demokraća), Top 09 a KDU-ČSL (Křesćanscy demokraća) je w zašłych štyrjoch lětach 51 procentow swojich wolerjow zhubiło. Porno tomu je sej opoziciska strona Ano 71 procentow swojeho wolerstwa wobchowała. Prawicarsku stronu „Swoboda a Direktna Demokratija“ (SPD) byštej tež lětsa dwě třećinje wolerjow z lěta 2021 woliłoj. To zwěsći naprašowarnja Stem/Mark zašły tydźeń. Struchły wuslědk naprašowanja woznamjenja za zjednoćenstwo Spolu, zo by 14 procentow swojich hłosow na stronu Stan (Strona měšćanostow) přisadźiło.
