Marek Krawc rozprawja wo aktualnje rozjimanych temach w Čěskej
Praha. Archeologojo su w Morawskim krasu něšto namakali, štož je za čěske stawizny přewšo wuznamne. Prěni króć su w jednej z mnohich prózdnjeńcow w tamnišej kónčinje prastaru rysowanku wotkryli. Po měnjenju skupiny mjezynarodnych slědźerjow je wona 14 000 do 15 000 lět stara a słuša do kultury Magdalénjanow. Tuta archeologiska kultura je na kóncu poslednjeje lodoweje doby wosebje w zapadnej Europje swoje slědy zawostajiła. Na Morawje běchu tehdomniši wobydlerjo hłowu a šiju konja do kamjenja dypali. Rysowanka pokazuje, zo njeje figuratiwne wuměłstwo w prózdnjeńcach jenož zapadoeuropska wosebitosć, fachowcy w nowinarskej zdźělence pisachu. Wuslědk swojich dalšich přepytowanjow su slědźerjo w fachowym časopisu Journal of Paleolithic Archaeology wozjewili.
