Marek Krawc rozprawja wo aktualnje rozjimanych temach w Čěskej

Praha. Hišće do wulkich prózdnin překwapi čěske kolije wobhospodarjowace předewzaće České dráhy (ČD) pasažěrow z nowym poskitkom. Dwójce wob dźeń jězdźa nětko ćahi z Prahi do Kopenhagena. Po jenož dwanaćehodźinskej jězbje móža pućowacy hižo po danskej stolicy dundać. Komfortabelnu jězbu z ćahom zaručeja nowe wagony typa ComfortJet. W lěćnych měsacach je přidatnje nócny ćah po puću.

„Jězby z ćahami za dalokowobchad su tuchwilu po cyłej Europje jara woblubowane. Naš europski projekt tutomu wuwiću wotpowěduje. Zwoprawdźamy jón hromadźe ze statnymaj železnicomaj Němskeje a Danskeje“, informuje rěčnica ČD Vanda Rajnochová. 14. junija su zastupjerjo železnicow, mjez nimi tež němski wobchadny minister Patrick Schnieder, nowu železnisku čaru za wysoke spěšnosće zahajili, kotraž słuša k pilotowym projektam Europskeje unije.