Marek Krawc rozprawja wo aktualnje rozjimanych temach w Čěskej

Praha. Tak kaž tuchwilu skoro kóždy europski kraj bědźi so tež Čěska ze suchotu. Minjeny štwórtk bě sej premierminister Andrej Babiš k spjatemu jězorej Slapy dojěł, zo by so na městnje wo njedostatku wody přeswědčił. Wosebje w kónčinje wokoło woblubowaneho wulětnišća so suchota wuraznje jewi. Tež Petr Kubala, generalny direktor statneho wodohospodarskeho předewzaća Wołtawy Povodí Vltavy, ma to za „alarmowacy staw. Po cyłym přitočnišću Wołtawy zwěsćamy znjeměrnjacu suchotu. W rěkach, kotrež ju z wodu zastaruja, měrjachmy w zašłych tydźenjach jara niske stawy wody. W někotrych rěkach smy mjeztym samo historisce najniše hódnoty scyła zwěsćili“, zdźěli Kubala na nowinarskej kon­ferency. W južnych Čechach wšak „po­łoženje cyle tak grawoćiwe njeje“, podšmórny generalny direktor. Zastupjerjo druheho wulkeho wodohospodarskeho předewzaća Čěskeje Povodí Moravy, kotrež so wo přitočnišćo rěki Morawy stara, starosća so tohorunja niskich hładźinow wody w rěkach dla.