Motiwy za nadpady z nožom na třoch pólskich šulach dotal njejasne

Wařsawa. W Pólskej dožiwichu minjeny tydźeń „čornu seriju“ podawkow – tak mjenowaše pólski nadregionalny dźenik Rzeczpospolita tři nadpady z nožom na šulach w Mazowskim wojewódstwje, kotremuž tež stolica Waršawa přisłuša. Policija je w zwisku z podawkami něhdźe 65 000 kontrolow na kubłanišćach přewjedła a dohromady 117 ludźi zajała.

Na powołanskej fachowej šuli we Waršawje bě 21lětna młoda žona tři studentki z nožom nadběhowała a zraniła. Na sewjerje wojewódstwa, na šuli w městačku Ostrołęce, zrani 19lětny šuler minjenu srjedu dźewjeć ludźi z nožom, mjez nimi pjeć šulerjow a dweju wučerjow. Tohorunja z nožom je dźeń pozdźišo 15lětny bywši šuler ludźi na šuli we wjesce Leszczydół-Nowiny nadběhował. Wón mori 36lětnu domownicu a zrani wučerku kaž tež direktora šule.