We Worklecach wotmě so njedawno 9. młodźinski koparski turněr zapósłancow krajneho sejma Alojsa Mikławška a Franka Hirchi kaž tež europskeho zapósłanca Hermanna Winklera.
Dohromady wobdźěli so we Worklečanskej sportowej hali dźesać wólnočasnych koparskich teamow. Tež tři serbske cyłki běchu zastupjene. Zakitowarja pokala ze Smjerdźaceje zastupowaše cyłk z Pančic-Kukowa a tež dwaj kolektiwaj Worklečanskich koparskich přećelow podachu so na halowy parket. Dale hrajachu Gymnazij Kamjenc, Gymnazij Wojerecy, Traktor Jitk, DRK Komando Ohorn, Accumotive I a II a TSV 1805 Ohorn.
Halowy rěčnik Jonas Klawitter, kiž je tež šulerski rěčnik Kamjenskeho Lessingoweho gymnazija, měješe tón dźeń kopicu dźěła, wšako su koparjo wjele wrotow třěleli. Mjenje dźěła měješe sudnik Detlef Kral při zwjetša fairnym wotběhu wubědźowanja. Moto tež bě, z wjeselom při kopańcy dobru zhromadnosć pěstować.