ST Marijina hwězda – ST Nadrózna Hrabowka 1:0 (0:0)
Zestawa domjacych: O. Schmidt – Wróbl, Ch. Cyž, Bělk, Lipič (53. R. Cyž), Peschmann, Hawš (62. Winkler), Pjetaš, P. Schmidt, Eldor (78. Čornak), Pakoßnick
W druhim wokrjesnym pokalnym kole je so prěnje koparske mustwo ST Marijineje hwězdy snadnje přećiwo Nadróznej Hrabowce (Straßgräbchen) přesadźiło. Dobyće pak bě zasłužene. W ekstremnje słabej partiji nasta wjele zmylkow a tójšto njetrjebawšich dołhich třělwow, tak zo žadyn porjadny hrajny natwar móžny njebě. Přiwšěm mějachu domjacy swoju prěnju móžnosć po dźesać mjeńšinach. Po dobrym přihoće Richarda Hawša steješe Jakob Pakoßnick sam před wrotarjom hosći, njezamó pak bul do syće sunyć. Tež dalšej pospytaj Matijasa Wróbla a Feliksa Pjetaša njeběštej wuspěšnej. W 23. min. bě to znowa Hawš z prima přihrawku Křesćanej Bělkej, kiž pak z kónčkojteho kuta na wrotarju zwrěšći. Do połčasa mějachu Pančičenjo jenož hišće jednu naspomnjenjahódnu scenu. Wólny kop Paula Schmidta na žerdź je Falko Peschmann jeno snadnje misnył (34.).