Dynamo Drježdźany a FSV Budissa Bu­dyšin chcetej při spěchowanju dorosta přichodnje zhromadny puć kročić. Na nowu kooperaciju stej so wobaj klubaj oficialnje při hrě druheje zwjazkoweje ­ligi minjenu sobotu dojednałoj. Z tym zjednoćitej swoje kompetency, zo byštej talenty z regiona zaměrnje wuwiwałoj a dołhodobnje spěchowałoj. W srjedźišću dojednanja steji wuska fachowa ­wuměna kaž tež zwoprawdźenje zhromadnych naprawow při wukubłanju koparskeho dorosta. K tomu słušeja mjez druhim zhromadny trening talentow kaž tež prawidłowne testowe hry mjez dorostowymaj mustwomaj wobeju towarstwow.