Mysle k nowemu zynkonošakej Sorbian New Folk 2

pjatk, 28. apryla 2017
artikl hódnoćić
(0 )

„Orchester Serbskeho gymnazija Budyšin, kotryž bu 2001 załoženy, zetkawa so kóždu srjedu pod nawodom Conny Wolf na dwuhodźinsku probu. Ličba sobuskutkowacych so lětnje měnja, dokelž nowačcy k tomu přińdu a maturanća orchester po zakónčenju šule wopušća. Mjeztym druha cejdejka je zběrka kompozicijow orchestroweje nawodnicy, kotrež maja zwjetša motiw serbskich ludowych spěwow. Elementy jazza, bluesa, swinga a dalšich hudźbnych družin zwjazuja so do zajimawych modernych kruchow.“ Tak daloko k wopisowanju w bookleće noweje cejdejki Sorbian New Folk 2.

Před wjace hač pjatnaće lětami běch sam sobustaw woneho orchestra. Dopominam so hišće na twórby kaž Charleston, kotryž bu za přewod rejwanskeje skupiny Serbskeho gymnazija nazwučowany a mjez druhim na schadźowance wuspěšnje předstajeny.

Myslu pak tež na atonalny kruch Rubježnicy k podmolowanju wuměłskeje słuchohry. Njeběchu to jeno za mnje nowe móžne wurazy tworjenja a wuwjedźenja hudźby, kotrež tehdy nazhonichmy. Bjez wuměłskeje žiłki a zdźěla ekscentriskeho charaktera nawodnicy Conny Wolf njeby to prawdźepodobnje móžno było. Někotři hudźbnicy, kotřiž běchu tehdy hižo pódla, hišće dźensa z njej hromadźe hudźa – na přikład saksofonistka Jana Šołćic a trompetar Paul Kanig.

Nětko pak k nowostce. Při prěnim přeposłuchanju albuma napadnje hustodosć njewurunany miks zwuka. Dale jewja so často hrube intonaciske zmylki a rytmowe njedokładnosće instrumentow nastupajo synkopy, štož je za konwencionelny proces produkcije zwukonošaka (koncept, proby, nahrawanja, miks a master) prosće njerozkładomne. Drježdźanske nahrawanske studijo HOROS njeměješe žane referency k přirunowanju. Snano tči přičina w mało praksy w zhromadnym hraću atd. Dale njeje jasne, na kotre wašnje bu cejdejka natočena – to rěka, hač zwukowe čary jednotliwje abo w cyłku abo někajka kombinacija z nich, štož k tajkemu rezultatej wjedźe.

Jednotliwe spěwy albuma dadźa so hrubje do žanrow swing, jazz, folk a pop zarjadować, při čimž jewja so husto měšeńcy a kombinacije z nich.

Do toho słušeja spěwy Jako ze swojim lubym (swing-standard), Z nalěćom (jazz/pop) a Štó to wěri, kak to boli (wobdźěłanje motiwa serbskeho ludoweho spěwa w pop/folk). Afro a Spěw wody matej elementy folka a tak mjenowaneje swětoweje hudźby, w kotrejž so zapadne a njezapadne hudźbne praktiki zwjazuja. Tele wopisanje žanra pak njeje jednozmyslne, tuž hodźi so wo tym diskutować. Jako přikład za analyzu radźenych spěwow poskićatej so wotewrjenski titul 2+2 a Palenc. W prěnim pokazuje so hłowna tema/melodija na spočatku a krótko do kónca twórby w 4/4-takće. W mjezydźělu přizamknu so improwizacije basa, klawěra a trompety w 6/8-takće. Čerwjenu nitku spěwa twori basowa figura, wobstejaca z třoch synkopow a podpěrana přez bijadła (prěnja, štwórta a sedma šěsnaćina wariěrowaca přez HiHat, Snare abo wulki bubon), njehladajo na 6/8- abo 4/4-takt. W Palencu wariěruja tempo swinga refren – pře wšu měru přitulne a wjele pomałši hač spěwany original – a štučki, prezentowane w dwójnej spěšnosći. Jazzowe solo trompety a saksofona w mjezyhrě posrědkuje lounge-feeling. Jako zakónčenje twórby přizamknu so wariacije refrena łaćonskoameriskich rytmow.

Naposledk maja pak so tež tři njeporadźene přikłady mjenować. W Běži woda so wuměłski srědk, běžacu wodu instrumentalnje předstajić, skerje mjenje šlachći. Hačrunjež ma wjeršk spěwa po interpretaciji bookleta puć wody­ přez serbsku domiznu rysować – woda powěda wo wójnje, smjerći a kwakli a zbudźa nadźiju na swobodnu Łužicu –, nawali so skerje wobraz wusaknjeneho žórła. Móže pak so wobraz wužiwać, po kotrymž wona woda nětko w deminutiwje słowa (wódka) po kyrku připosłucharja ćeče, zo by so takle znjesliwosć twórby wolóžiła. Prěnja połojca a kónc twórby Bratřik Jakub kaž tež posledni spěw Kuram sypnyć­ su z wotstawkom najwostudliše a najdiletantniše wobdźěłanje ludoweju pěsnjow, kotrež sym hdy słyšał.

Facit: Tónle album je zdźěla jenož za słucharjow z wysokej bólnej hranicu. Jurij Wjenk

wozjewjene w: Kultura & wuměłstwo
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND