Drježdźany (JM/SN). Sakska krajna stolica hotuje so znowa na kulturny wjeršk, kiž kóždolětnje dźesaćitysacy hosći nawabja: na mjeztym 52. mjezynarodny dixi-festiwal wot 12. hač do 19. meje 2024. Wo nadrobnosćach wosom dnjow trajaceho sławneho hudźbneho eventa su předwčerawšim, srjedu, na nowinarskej konferency informowali.
Cyłkownje 38 skupin a solistow z dźesać krajow so lětsa wobdźěli. Organizatorojo planuja 44 zarjadowanjow z 250 „hudźbnymi hodźinami“, bjez přidawkow. Wosebje wažne: Nimale połojcu muzikaliskeho časa móža přihladowarjo darmotnje dožiwić. Jedyn z wjerškow je jazzowa mila na Praskej dróze w Drježdźanach njedźelu, 19. meje. Kruće zaplanowana je tež parada skupin samsny dźeń wokoło Brühlskich terasow.
Nimo wulkich centralnych zarjadowanjow přihotuja tež hudźbne dožiwjenja za swójby kaž koncert w zwěrjencu, wosebite zarjadowanje za dźěći w kulojtym kinje, koncert skupin w kulturnym palasće abo gala pod hołym njebjom na jewišću w Młodej gardźe.