Wo přichodźe serbskeho pastoralneho ruma wuradźowali

Smochćicy (SN/BŠe). Drježdźansko-Mišnjanske biskopstwo je wčera zastupjerjow wosadnych předstejićerstwow, wosadnych radow a čłonow wodźaceje skupiny serbskeho pastoralneho ruma do Smochćic přeprosyło, zo by z nimi wo přichodźe serbskeho pastoralneho ruma wuradźowało. Spočatnje wuzběhny Drježdźansko-Mišnjanski biskop Heinrich Timmerevers sylnosće serbskich wosadow, hdźež wón hišće ludowu cyrkwju dožiwja. Katolscy Serbja su ze swojej kulturu, rěču a wěru wusko zwjazani a maja stabilne struktury, w kotrychž čestnohamtske dźěło wažnu rólu hraje. To je wulke bohatstwo. „Serbja su žiwa zhromadnosć, při čimž su wšitke generacije zapřijate“, wón zwurazni. W serbskim pastoralnym rumje su mjez druhim z putniskej cyrkwju w Róžeńće a z klóštrom Marijina hwězda w Pančicach-Kukowje cyrkwinske stejnišća, kotrež su za biskopstwo njesměrnje wažne.