Queerni ludźo so w „zadnim kraju“ namocy prawicarjow wobaraja

Budyšin/Choćebuz/Zhorjelc (SN/MG). Njedźelu njeswjećimy jenož dźeń dźěsća, ale zdobom započnje so tak mjenowany Pride month, měsac hordosće queernych ludźi. Cyły junij je za nich wulki swjedźeń jich identity a seksuality. Tola nic jenož w juniju queerni ludźo hordźe wuznawaja, koho lubuja a jako štó so identifikuja. Wosebje tak mjenowane CSD-parady su dalši wuraz wuznaća k pisanosći a diwersiće. Tute parady zarjaduja iniciatiwy abo towarstwa, zo bychu zjawnje na eksistencu druhich seksuelnych identitow a formow lubosće pokazowali. Tež w mjeńšich městach, wosebje na wuchodźe Němskeje, je so lěto a wjace iniciatiwow wuwiło, kotrež wone parady, ale tež dalše formaty za reprezentaciju queerneho žiwjenja organizuja.