Studija zaběra so z přičinami dołhodobneje bjezdźěłnosće

Radebeul/ Kamjenica (dpa/SN). Dołhodobnje bjezdźěłni trjebaja, pytaja-li za nowym dźěłom, indiwidualne poradźowanje a wosebitu podpěru. To je wuslědk studije, na kotrejž je sakski krajny zwjazk Diakonije sobu dźěłał. „Centralne prašenje bě: Čehodla nawróća so dołhodobnje bjezdźěłni najebać mnohe njewobsadźene městna jenož zrědka na powołanske wiki“, rozkładuje Marko Hietzke, referent za spěchowanje dźěła a dźěło z bjezdźěłnymi Diakonije. Za kwalitatiwnu studiju so mjez druhim 34 potrjechenych po cyłej Němskej woprašowachu. W normalnym padźe je dołhodobna bjezdźěłnosć staw, kotryž so sam wot so posylnjuje, rjekny Hietzke. „Jedna z tych, kotrychž smy so woprašeli, to takle rjekny: Chorosće dla sym bjezdźěłna a bjezdźěłnosće dla sym chora.“ Potrjecheni su často wopor zahubneho kołoběha. „Čim dlěje bjezdźěłnosć traje, ćim ćešo je, ju zaso wopušćić.“ Ambiwalency a strachi hladajo na wočakowane regularne dźěło hraja centralnu rólu.