W kopańcy častohdy słyšiš a čitaš, zo ma te abo tamne mustwo noweho trenarja. Přičiny měny su wšelakore, hač je to wuběžace zrěčenje abo konflikt z předsydstwom abo jednaćelstwom. Twjerdźu pak, zo je hłowna přičina pušćenja trenarja husto, zo mustwo planowany cil hubjenych wukonow dla njedocpěje.
Kónc tydźenja wobhladach sej hru Drježdźanskich mjetelčkow w telewiziji a wukon DSC njebě dobry. Z jenož wosom hrajerkami běchu mjetelčki do Stuttgarta jěli a to na poslednju hru předkoła. Mustwo bě wjacorych koronainfekcijow dla deciměrowane. A tak nastupi Drježdźanski cyłk pod tutymi wobstejnosćemi na zhubjenej poziciji přećiwo mustwu prěnjeje aliancy MTV Stuttgart. Poražka bě wočiwidna a přihladowar hry je móhł widźeć, zo tuta zestawa hišće husto zhromadnje na hrajnišću stała njebě. Chowanče trenarja Alexandera Waibla pak móžachu přiwšěm po 0:3 poražce (17:25, 19:25, 19:25) z pozběhnjenej hłowu domoj jěć.
