Wučerska wolejbulowa liga Budyskeho wokrjesa ma nowe serbske mustwo. Koleginy a kolegojo serbskeju wyšeju šulow Worklecy a Ralbicy startowachu do dypkowych hrow a su tučasnje na 3. městnje w tabulce. Wjeselu so wosobinsce, zo je kombinowany cyłk z młodej hrajerku Nadine Čižankec hač k rutinjejej Pětrej Bejmakej tutón turněr rady přiwzał. Přeju mustwowemu nawodźe Šćěpanej Wjence a dalšim zahoritym wolejbulistam wuspěšnu sezonu, kotraž so na lětušim dnju dźěsća, 1. junija ze serbskim duelom přećiwo wučerjam Serbskeho gymnazija Budyšin (SGB) skónči. Dotal najwuspěšniši cyłk běchu wučerjo Serbskeho wučerskeho wustawa Budyšin z cyłkownje 14. wokrjesnymi titlemi a to wot 1976 do 1991. A wot 1992 do 2020 skónčichu pedagogojo SGB wubědźowanje dwanaće razow na prěnim městnje.