Měsac julij steji w znamjenju kolesowanja. Před 120 lětami, w juliju 1903, přewjedźe so prěni raz w Francoskej „najwjetše kolesowarske wužadanje swěta“. Tak připowědźi to nowina L’Auto, wudawana wot Henrija Desgrange. Dźensa je so jeho Tour de France wuwiła ke, kaž Wikipedija praji, třećemu najwjetšemu sportowemu zarjadowanju na swěće. Wažnej přičinje drje stej, zo je to sprěnja jedne z mało wubědźowanjow, kotrež je za přihladowarjow zadarmo. A fanojo přińdu sportowcam při čarje tak blisko kaž nihdźe druhdźe. Sam smědźach jónkrótnu atmosferu 2017 při starće w Düsseldorfje w prěnim rynku dožiwić. Zdruha je Tour de France w běhu lětdźesatkow tójšto dramow a skandalow produkowała, kotrež zaběrachu cyły swět. Bohužel skutkuje w Němskej hač do dźensnišeho stawizna wěsteho Jana Ullricha, kiž je najprjedy do kolesowarskich njebjes spěł a potom hłuboko do kolektiwneje njehnady padnył. Swój dopingowy image njeje kolesowanje w Němskej z toho časa přeco hišće dospołnje wotbył.