Profijowe kaž tež amaterske koparske cyłki so tuchwilu na nowu hrajnu dobu přihotuja. Tež w sakskej stolicy je napjatosć mjez fanami a zamołwitym po postupje do druheje zwjazkoweje ligi wulka. Mustwo šwicarskeho trenarja Thomasa Stamma startuje z wonkownej hru přećiwo Greuther Fürthej do noweje sezony. Hižo na druhim hrajnym dnju wotměje so potom w Drježdźanach derby přećiwo cyłkej z Magdeburga. Stamm, kotryž bě do swojeho angažementa pola Dynama dźewjeć lět w Freiburgu trenar, je hač dotal ze swojim měrnym a wěcownym wašnjom přeswědčił. Na tutón faktor w juhu kraja wulku wažnosć kładu. W njeměrnym Drježdźanskim towarstwje je tale kajkosć hišće bóle požadana, wšako duje w druhej lize ­hinaši wětřik. Tak budźe wažne a rozsudne, zo dadźa jeho a cyły trenarski team wo­měrje dźěłać. Najwjetši wukon pak je so towarstwu hižo do sezony zešlachćił. Po ­wjacorych lětach maja Dynamowcy zaso mustwo U23, kotrež w krajnej lize nastupi. Za dorostowych hrajerjow je dźě to trěbny a prawy poskitk, zo móža so na kopańcu muži přihotować.