Kelko žołtych kartow sudnik mustwomaj dźensa pokaza? Tute prašenje je Wolfec nan z Worklec wčera swojim třom synam do hry stajił, jako so na Chróšćanskim sportnišću pódla mje sydnychu. Jako sudnik Robert Heinrich w 92. mjeńšinje dźewjatu kartu pokaza, bě jeho srjedźny syn Aleksander wjetu dobył. Wón bě mjenujcy na dźewjeć kartow tipował. Dźewjeć kartow klinči za poměrnje hrubej hru, tola serbski derby mjez Chró­sćicami a Ralbicami njebě nihdy nje­fairny, za to cyły čas jara zajimawy ­a stajnje napjaty. Tež mjez hrajerjemi a přiwisnikami žane křiwdźenja abo hłupe komentary słyšeć njeběchu. To smy hižo hinaše časy dožiwili. Mjeztym knježi mjez Chrósćicami a Ralbicami tajke něšto kaž „strowa riwalita“, wšako su hrajerjo a přiwisnicy husto spřećeleni a mjezsobny respekt je wulki. Remis ­by hladajo na rozdźělenje šansow wčera zawěsće tež w porjadku był, tola ­de­lanscy koparjo su swoje móžnosće prosće lesćiwje wužili a mějachu zady tón abo tamny raz trochu wjac zboža a z Willijom Schönu tež sylneho wro­tarja!