Šwedske wjesne towarstwo Mjällby AIF je loni kedźbnosć zbudźiło, a to nic jenož swojich wulkich sportowych wuspěchow dla. Pomjenowanje dr. Karla Mariusa Aksuma za noweho šeftrenarja je krok, kotryž móhł za towarstwo kaž tež za cyły koparski sport směrodajny być. 35lětny Norwegčan je njedawno naslědnistwo Andersa Torstenssona nastupił, kotryž poziciju techniskeho direktora přewozmje.

Aksuma wobhladuja jako „mastermind“ za sensaciskim mišterstwom towarstwa. Mjällby, kiž pochadźa z idyliskeje rybarskeje wsy z jenož 1400 wobydlerjemi, doby loni nazymu z jimacymi 75 dypkami z cyłkownje 30 hrow mišterstwo a přetrjechi dotalny rekord ligi wo wosom ličakow. Tónle triumf je so w koparskim swěće wo wysoke žołmy postarał a Aksuma do srjedźišća sunył.