Prožym (SN/BŠe). Klimowi aktiwisća z Němskeje a cyłeje Europy zetkaja so wot 9. do 16. meje mjeztym hižo šesty raz na Łužiski klimowy a energijowy camp. Jedyn z wjerškow budźe lětsa 14. meje we Wjelcej předwidźana zhromadna demonstracija zwjazkow najwšelakorišich organizacijow a iniciatiwow. Hesło „Přestać brunicu wudobywać, klimu škitać, wsy wuchować!“ měri so jasnje přećiwo nowym wuhlowym jamam. Iniciatiwa Ende Gelände je za čas klimoweho campa akciju ciwilneje njeposłušnosće připowědźiła. Mjeztym wšak politiscy zastupjerjo regiona před akciju warnuja a namołwjeja ludźi k měrliwemu wobchadźenju z problematiku.
Lětsa zetkaja so aktiwisća w Prožymje. Tam wšak wobsteji wěsta symbolika mjez wsu, kotraž ma so rozšěrjenja brunicoweje jamy Wjelcej II dla wotbagrować, a sćěhami wudobywanja wuhla dla.