Nowy přijězd k jamje přinjese wobydlerjam wolóženje

Pěskecy (JK/SN). Pěskečanska pěskowa jama ma so rozšěrić. Tuchwilny wobhospodarjer, Róžeńčanska twarska towaršnosć Sorabija je za to dała inženjerskemu běrowej Galinsky w Großschirma pola Freiberga nadawk, wobłukowy zawodny plan zestajeć. Pěskowa jama podleži hórniskemu prawu, tuž je za rozšěrjenje kaž pola wuhlowych jamow tajki plan trěbny. Předpołožić ma so tón wyšemu hórni­skemu zarjadej w Freibergu, zo by jón pruwował a přizwolił. Zarjad dowola abo wobmjezuje dalše wudobywanje pěska. Z wotpokazanjom plana wšak inženjerski běrow njeliči.

Rozšěrjena Pěskečanska jama změje zdobom nowy přijězd. Tón njepowjedźe nimo domskich w Pěskecach, ale nimo wsy. To budźe blisko puća do jamy bydlacym wolóženje. Hdyž budźe rozšěrjenje schwalene – inženjerski běrow liči z tym kónc junija – ma Njebjelčanska gmejna sobu rozsudźić, kak přijězd najlěpje připrawja a kak tón do jamy powjedźe.