Prožym (SN/BŠe). Wjac hač 2 000 ludźi z cyłeje Europy chce so přichodny kónc tydźenja na akciji ciwilneje njeposłušnosće we łužiskim brunicowym rewěrje wobdźělić. Tole zdźěli zwjazk Ende Gelände, kotryž organizuje akciju w zwisku z klimowym campom. Předwidźane je, zo so aktiwisća do wuhlowych jamow zadobudu a tam technisku infrastrukturu blokuja. Zaměr je, w akciskim času wot 13. do 16. meje wustork wuhlikoweho dioksida pomjeńšić a tak na zanjerodźenje wobswěta skedźbnić.

Zwjazkej Ende Gelände pomhaja wšelake přirodoškitne organizacije, kaž Robin Wood abo wobswětowy a přirodoškitny zwjazk BUND. Tež mjezynarodnje dóstawaja aktiwisća wulku podpěru. Dotal je 25 busow z dwanaće wšelakich krajow za kónc tydźensku akciju přizjewjenych. Dalše skupiny ze Šwedskeje, Francoskeje, Jendźelskeje, Awstriskeje a Šwicarskeje su z kolesom po puću do Łužicy.